На 17 Јули, по покана на католичката црква “Свети Панкрациус” од Мајнц, а по повод летниот фестивал организиран од католичките цркви од населбата Хецхајм, за наше големо задоволство пред верниците на католичката црква од градот Мајнц со свој штанд бевме претставени и ние како македонци и верници при македонскиот храм “Свети Никола” од истоимената населба. На почетокот на фестивалот парохискиот свештеник отец Михаил како домаќин и организиратор во својата најава поздравувајќи ги гостите нас како македонски народ со своја црква не поздрави и изрази благодарност што и ние со нашето присуство зедовме учество на овој настан. 

Во една пријатната атмосфера во духот на братската љубов и вера во Христос, нашиот народ и црква беше претставен пред домаќините и гостите, кои пак не ја криеја својата љубопитност за што повеќе да научат за нас како народ, култура, вера и црква. Благодарејки на организаторите нашиот тим од црквата “Свети Никола” од Мајнц оствари контакти со видни личности од истоимениот град, кои пак несебично изразија силна подршка за досега направеното, но и за идните наши планови и активности. Секако на крајот од католичката миса уште еднаш бевме споменати како братски во Христа народ кои пред се може да придонесе во взаемните интереси – љубовта и почитта преку Христос нашиот заеднички Бог.